हिमालयन साँझ सम्पन्न

टोकियो-गोल्डेन वीकको अवसर पारेर रोविनप्रसाद शेरचन र प्रेम श्रेष्ठको संयुक्त आयोजनामा “हिमालयन साँझ” टोकियोमा सम्पन्न भएको छ । नेपालबाट आमन्त्रित युगल जोडी गायक उदय सोताङ्ग र गायिका मनिला सोताङ्गका साथमा टोकियोमा रहेका नेपालीहरुले सँगसँगै गाए, नाचे अनि रमाए । पर्वतको रानीपानी गाविसमा रहेको एउटै परिवारका ५ जना अपाङ्ग वालवालिकाहरुको सहयोगार्थ उक्त कार्यक्रमको आयोजना गरिएको थियो । निर्धारित समयभन्दा केही ढिला शुरु भएको कार्यक्रममा टोकियो आसपासमा वसोवास गर्ने नेपालीहरुले हल खचाखच भरिएको थियो भने नेपाल र नेपाली गीत संगीतलाई माया गर्ने जापानी नागरिकहरुको पनि उल्लेख्य सहभागीता रहेको थियो ।
सोही अवसरमा जापानमै स्थापित चौतारी व्याण्डको पनि धमाकेदार प्रस्तुतीहरु रहेको थियो । विशेषतः चौतारी व्याण्डको प्रस्तुतीमा बाँसुरीको धुनले सबै दर्शकहरुलाई मन्त्रमुग्ध बनाएको थियो । उपस्थित जापानिज दर्शकहरु पनि बाँसुरीको तालमा ताल मिलाई थपडी बजाई आफूहरुलाई नेपाली संगीतमा लिप्त बनाईरहेका थिए । त्यसै क्रममा सुदिन गुरुङले पनि आफ्नो सांगीतिक कोशेलीहरु पस्केका थिए । कार्यक्रममा चौतारी व्याण्डले संगीतको माध्यमबाट नेपाललाई विदेशमा चिनाउन प्रयत्न गरिरहेको जानकारी दिईएको थियो । कार्यक्रमको पहिलो चरणमा नै जापनिज गायिका सायाले पनि आफ्नो केही प्रस्तुतीहरु राखेकी थिइन । त्यसो त कार्यक्रममा जादूगर तोकोले आकर्षक जादू देखाएर दर्शकहरुलाई वेग्लै स्वाद चखाएका थिए ।
कार्यक्रमको प्रमुख आकर्षणको केन्द्र रहेको नेपालबाट आमन्त्रित युगल जोडी गायिका मनिला सोताङ्ग र गायक उदय सोताङ्गको प्रस्तुती भने लगभग कार्यक्रमको मध्यभाग भन्दा पछाडि रहेको थियो । नमस्ते व्याण्डका संस्थापक इश्वर गुरुङले सोताङ्ग दम्पतीलाई स्टेजमा निम्त्याएका थिए । अन्य कार्यक्रमहरुमा भन्दा पृथक शैलीमा युगल जोडीको स्टेजमा प्रवेश भएको थियो । युगल जोडी स्टेजको पछाडितिरबाट “आधिबाटो हिडेपछि तिमीसँग भेट भयो” भन्ने बोलको गीत गाउँदै स्टेजमा प्रवेश गरेका थिए । सोताङ्ग दम्पतीलाई स्टेजमा निम्त्याइए पछि सबै दर्शकहरु स्टेजतिर हेरिरहेका थिए । तर एक्कासी पछाडिको ढोकाबाट गाउँदै अगाडि बढन थालेपछि दर्शकहरुमा वेग्लै माहौलको सृजना गरेको थियो । हलको पछाडि दुइतिरबाट गाउँदै स्टेजमा गई भेट भएपछि उदयले मनिलालाई फूलको थुँङ्गा दिएका थिए ।
युगल जोडीले आज तिम्रो कुरा चल्यो, भिज्यो सिरानी, तिमी विना वाँच्न गाह्रो भो जस्ता चर्चित गीतहरु गाएका थिए । कार्यक्रममा सोताङ्ग दम्पतीका छोरी श्रेय सोताङ्गको एल्वम शुरुवातको सिडी विक्री वितरण पनि गरिएको थियो । जसबाट उठेको रकम नेपालको स्कूलका गरीव तथा जेहेन्दार विद्यार्थीहरुको पठनपाठनमा सहयोग गरिने जानकारी दिईएको थियो ।

कार्यक्रमको अन्त्यमा सोताङ्ग दम्पती र म्यूजिक एरेन्जर उदय पौडेल, चौतारी व्याण्डका पञ्च लामा, सुदिप गुरुङ्गलाई आयोजकको तर्फाबाट सम्मान गरिएको थियो । त्यसो त जापानमा भएका अन्य संघ संस्थाहरुले पनि सोताङ्ग दम्पतीलाई सम्मान गरेका थिए । सम्मान गर्ने क्रममा वी फल अलका तर्फबाट सरोज खत्री, नेपाल जापान युथ क्लवबाट टासी लामा, किक वक्सिङ्ग च्याम्पियन मोहन ड्रागन, तामाङ्ग समाजबाट संजिव तामाङ्ग लगायतका व्यक्तित्वहरुले सम्मान गरेका थियो